មហាសេដ្ឋីចិន ចេកម៉ា ចង់រួមចំណែកនាំចេញកសិផលថៃទៅក្រៅប្រទេស

        នៅក្នុងជំនួបរវាងលោកនាយរដ្ឋមន្ត្រីថៃ ប្រាយុទ្ធចាន់អ៊ូចារ និង លោកមហាសេដ្ឋីចិន ចេក ម៉ា ប្រធានក្រុមហ៊ុនអាលីបាបានោះលោកនាយករដ្ឋមន្ត្រីបានសំនូមពរឲ្យក្រុមហ៊ុនអាលីបាបាចូលរួមចំណែកក្នុងការលើកស្ទួយក្រុមហ៊ុនខ្នាតតូច និងមធ្យមនៅក្នុងប្រទេសថៃ ក៏ដូចជាជួយនាំយកកសិផលរបស់ប្រទេសថៃទៅកាន់ទីផ្សារចិន និងប្រទេសនានាទៀតនៅក្នុងតំបន់អាស៊ាន។

លោកMaj Gen Werachon Sukondhaparipak អ្នកនាំពាក្យរដ្ឋភិបាលថៃបានថ្លែងនៅថ្ងៃអង្គារ៍ថា តាមរយៈជំនួបក្នុងទីក្រុង Hangzhou កាលពីថ្ងៃច័ន្ទកន្លងទៅលោកប្រាយុទ្ធបានអញ្ចើញក្រុមហ៊ុនចិន អាលីបាបា មកជួយអភិវឌ្ឍលើប្រព័ន្ធទំនាក់ទំនងសម្រាប់ក្រុមហ៊ុនខ្នាតតូចនិងមធ្យមរបស់ប្រទេសថៃ។ តាមរយៈកិច្ចសហប្រតិបត្តិការណ៍នេះ វានឹងផ្តល់ផលប្រយោជន៍ដល់ភាគីទាំងសងខាង ទាំងក្រុមហ៊ុនតូច និងមធ្យមនៅក្នុងប្រទេសថៃ ក៏ដូចជាក្រុមហ៊ុនអាលីបាបាផងដែរ។

លោកម៉ាក៏បានប្រាប់ទៅលោកនាយករដ្ឋមន្ត្រីផងដែរថា កិច្ចសហប្រតិបត្តិការណ៍នេះនឹងជួយឲ្យក្រុមហ៊ុនខ្នាតតូច និងមធ្យមរបស់ថៃ អាចមានលទ្ធភាពក្នុងការសិក្សាពីក្រុមហ៊ុនរបស់លោកនៅលើសកម្មភាពនៃការលក់ផលិតផលតាមបែបទំនើប នឹងដើម្បីស្វែងរកប្រាក់ចំនេញក្នុងរយៈពេលខ្លី។ លោកមហាសេដ្ឋីចិនក៏បានសំណូមពរទៅកាន់រាជរដ្ឋាភិបាលថៃឲ្យជ្រើសយកប្រព័ន្ធបង់ប្រាក់របស់ក្រុមហ៊ុនអាលីបាបា នៅក្នុងការនាំចេញទំនិញទៅលក់នៅក្នុងប្រទេសចិនផងដែរ។ បន្ថែមពីនេះលោកម៉ា មានសុទិដ្ឋិនិយមថាតាមរយៈការជ្រើសរើសក្នុងការប្រើប្រាស់សេវាកម្មរបស់ក្រុហ៊ុនលោកនោះវានឹងជួយលើស្ទួយក៏ដូចជាផ្សព្វផ្សាយពីវិស័យទេសចរណ៍របស់ប្រទេសថៃទៅកាន់ភ្ញៀវទេសចរចិនផងដែរ។

ប្រភព Bangkok Post