ស្វែងយល់អំពីជំងឺ Zika

ប្រវតិ្តនៃ ជំងឺ Zika 

Zika ជាឈ្មោះព្រៃនៃប្រទេស Uganda ជាកន្លែងដែលមេរោគ Zika ត្រូវបានរកឃើញជាលើកតំបូងក្នុងឆ្នាំ 1947។ ករណីដំបូងដែលមនុស្សបានឆ្លងមេរោគនេះ គឺនៅឆ្នាំ 1952 ហើយក៏ឆ្លងរាលដាលជាបន្តបន្ទាប់។

អ្វីទៅជា ជំងឺ Zika? 

ជំងឺ Zikaជាប្រភេទជំងឺឆ្លង បង្កដោយ មេរោគ Zika ( ZIKV ) ដែលស្ថិតក្នុងគ្រួសារ Flaviviridae ក្រុម Flavivirus. ភ្នាក់ងារចំលងរបស់វាគឺ មូសខ្លាដែលផ្ទុកមេរោគនេះ ( Infected Aedes mosquitos )។

រោគសញ្ញា​ ​ជំងឺ Zika ​​​​មានអ្វីខ្លះ? 

ចំពោះមនុស្សធម្មតា​ ក្រោយពេលឆ្លងមេរោគនេះគឺស្ទើរ តែគ្មានរោគសញ្ញា​​ ឬ មានរោគសញ្ញា​ស្រាលៗដូចជា៖

· ក្តៅខ្លួន (Fever)

· ចេញកន្ទួលក្រហម (Rash)

· ឈឺសន្លាក់ (Joint pain )

· ភ្នែកក្រហម (Conjunctivitis )

និងរោគសញ្ញាបន្ទាប់បន្សំដូចជា៖​ឈឺសាច់ដុំ​ ឈឺក្បាល​ …

តើអ្នកណាជាអ្នកប្រឈមមុខខ្លាំងទាក់ទងទៅនឹងបញ្ហាសុខភាពក្រោយពេលឆ្លងមេរោគ Zika?

ស្ត្រីមានផ្ទៃពោះជាអ្នកប្រឈមមុខខ្លាំងទាក់ទងទៅនឹងបញ្ហាសុខភាពក្រោយពេលឆ្លងមេរោគ Zika ធ្ងន់ធ្ងរជាងគេ។​​ វាអាចបណ្តាលអោយមាន​បញ្ហាដល់ កូនក្នុងផ្ទៃ ដូចជា ទារកស្លាប់ក្នុងផ្ទៃ ឬ មានភាពមិនប្រក្រតីដល់ការលូតលាស់របស់ទារកដូចជាទារកមានក្បាលតូចខុសពីក្មេងធម្មតា​​ (Microcephaly)។​ 

តើជំងឺ Zika ចំលងមកមនុស្សតាមរយៈអ្វីខ្លះ?

ភ្នាក់ងារចំលងរបស់មេរោគ Zika គឺសត្វមូសខ្លាដែលមានផ្ទុកមេរោគ​ (Infected Aedes mosquitos)។​ ក្រៅពីនេះមនុស្សដែលផ្ទុកមេរោគ Zika ក៏អាចចំលង​ ពីមនុស្សម្នាក់ទៅមនុស្សម្នាក់ទៀតតាមរយៈការរួមភេទដោយមិនប្រើប្រាស់ស្រោម​អនាមយ័៕

តើជំងឺ Zikaត្រូវបានធ្វើរោគវិនិច្ជយ័យ៉ាងដូចម្តេច?

ដើម្បីធ្វើរោគវិនិច្ជយ័ជំងឺ Zika​ វេជ្ជបណ្ឌិតនឹងសាកសួរពីៈ

· ប្រវត្តិនៃការធ្វើដំណើររបស់របស់អ្នកជំងឺដែលសង្ស័យ

· អាការៈនិងរោគសញ្ញាសង្ស័យរបស់អ្នកជំងឺ

និងការធ្វើតេស្តឈាម និង ទឹកនោមដើម្បីរកមើលវត្តមានមេរោគ។

តើបច្ចុប្បន្ននេះមាន​វ៉ាក់សាំង ឬ ថ្នាំព្យាបាលជំងឺ​ Zikaដែររឹទេ?

បច្ចុប្បន្ននេះគេពុំទាន់រកឃើញ​វ៉ាក់សាំងដើម្បីការពារជំងឺ​ Zikaទេ។ ចំពោះការព្យាបាល គឹត្រូវព្យាបាលដោយប្រើប្រាស់ថ្នាំតាមរោគសញ្ញាដែលចេញដោយវេជ្ជបណ្ឌិត។

តើមានវិធានការអ្វីខ្លះដើម្បីទប់ស្កាត់ការឆ្លងជំងឺ​ Zika?

មធ្យោបាយដែលមានប្រសិទ្ធិភាពក្នុងការទប់ស្កាត់ការឆ្លងជំងឺ​ Zika គឺ ការពារខ្លួនអ្នក និង ក្រុមគ្រួសារពីមូសខាំ។

· គេងក្នុងមុងជ្រលក់ថ្នាំ

· ស្លៀកពាក់ អាវដៃវែង និង ខោជើងវែង…

· កំចាត់ប្រភពដែលមូសបង្កកំណើត

ប្រភពៈ​ CDC